Liderado da CSAG na cobertura que todos os seus medios fixeron da eclipse
A TVG liderou en Galicia a retransmisión televisiva do fenómeno
AGalega acadou o seu máximo diario de usuarios do ano, con máis de 54.000, e G24.gal achegouse ás 100.000 vistas nunha única xornada
A cobertura da eclipse mobilizou este mércores televisión, radio e plataformas dixitais da CSAG nun amplo despregamento ao longo de toda a xornada. Na TVG, a programación foi monográfica, con especiais informativos e programas realizados desde exteriores, numerosos puntos de directo, sinais externas, drons e conexións desde diferentes lugares de Galicia.
O Faro de Mera, en Oleiros, foi o centro da emisión da tarde, cun plató exterior desde o que Sabela Romar e Pablo Muñoz conduciron o especial durante a fase decisiva da eclipse. A TVG liderou en Galicia a retransmisión televisiva do fenómeno.
A cobertura completouse ao mediodía coa programación conducida por Raúl Quian e Marta Darriba e coas dúas edicións de Hora Galega, con Ribadeo como un dos principais puntos da xornada. O broche final chegou coa emisión do Eclipse Fest.
O despregamento estendeuse tamén a AGalega, G24.gal, AGalegaAudio, YouTube, a canle temática sobre a eclipse e a experiencia multicámara. AGalega acadou o seu máximo diario de usuarios do ano, con máis de 54.000, e G24.gal achegouse ás 100.000 vistas nunha única xornada.
A retransmisión en YouTube de Eclipse+ sumou 3.979 reproducións e xerou 205 novas subscricións á canle, ampliando o impacto da cobertura máis alá do consumo en directo. As redes sociais tamén axudaron na difusión do fenómeno: o propio día 12 unha soa publicación rebasou as 270.000 repruduccións. s
