Liberan unha muller dun coche, ferida ao bater contra un camión en Nigrán
Foi a mesma condutora quen deu aviso do accidente, advertindo que non podía saír do vehículo
Unha muller tivo que ser excarcerada á primeira hora da mañá deste venres tras resultar ferida ao chocar contra un camión en Nigrán.
Tal como informa o 112 Galicia, os bombeiros do Porriño tiveron que liberar á condutora que, sobre as 08:00 horas, perdeu o control do turismo que conducía e bateu contra un vehículo pesado, foise contra a mediana e envorcou. Ocorreu na autoestrada entre Baiona e Vigo (AG-57), á altura de Camos, en Nigrán, en dirección á cidade olívica.
Foi ela mesma quen alertou aos servizos de emerxencia, asegurando que non podía saír do coche.
Por iso, deuse aviso aos servizos de Urxencias Sanitarias, aos Bombeiros de Vigo e O Porriño, á Garda Civil, ao GES de Val Miñor, á Policía Local e ao persoal da autoestrada.
Unha vez no punto, os bombeiros excarceraron á vítima, que foi atendida polos profesionais sanitarios antes de ser trasladada a un hospital. O sinistro provocou retencións de tráfico na zona.
