O accidente dun avión privado deixa varios mortos nos Estados Unidos
O aparello esnafrouse durante a manobra de aterraxe nun aeroporto de Statesville, en Carolina do Norte
Varias persoas morreron este xoves no accidente dun avión no Aeroporto Rexional de Statesville, no condado de Iredell, en Carolina do Norte.
Por causas que se investigan, a aeronave esnafrouse cando estaba a aterrar.
O avión accidentado é un Cessna C550 pertencente a Greg Biffle, expiloto de coches de carreiras.
As autoridades non confirmaron se Biffle se atopaba a bordo no momento do sinistro.
Tampouco precisaron cantas persoas viaxaban no avión nin se houbo sobreviventes.
Biffle é coñecido tamén por participar en centos de misións de rescate en helicóptero no oeste de Carolina do Norte tras o paso do furacán Helene en 2024.
Imaxes difundidas desde o aeroporto mostran a aeronave envolta nunha gran bola de lume tras o impacto.
Os equipos de emerxencia desprazáronse de inmediato ata o lugar do accidente.
A zona permanece acordoada mentres continúan os traballos de investigación.
