Liberan un condutor en Oleiros que quedou atrapado no coche tras bater cunha árbore

Un condutor quedou ferido de gravidade nun accidente de tráfico rexistrado en Oleiros esta madrugada. 

O coche saíu da vía e bateu frontalmente contra unha árbore. Ao chegaren os servizos de emerxencias, comprobaron que o único ocupante do vehículo estaba inconsciente.

Foi necesaria a intervención dos bombeiros para sacalo do interior do coche a través dunha das portas laterais e trasladalo ao hospital. O sinistro tivo lugar contra as 03:00 na estrada AC-173, á altura da parroquia de Dorneda.