Liberan a condutora dun vehículo que bateu contra unha árbore no Corgo
A muller, de mediana idade, foi trasladada ao Complexo Hospitalario Universitario de Lugo
Imaxe cedida polos Bombeiros de Sarria
Unha muller, duns 40 anos, precisou dos bombeiros para saír dun coche sinistrado no Corgo. O coche no que viaxaba foise da vía e bateu contra unha árbore. A muller era a condutora e única ocupante do vehículo.
Ocorreu pasadas as sete desta madrugada na LU-546, en Anseán, O Corgo.
O 112 Galicia recibiu varios avisos sobre este sinistro, que obrigou a intervir os Bombeiros de Sarria debido a unha muller que estaba atrapada no interior. Unha vez liberada, foi atendida por un equipo de Urxencias Sanitarias de Galicia-061 quen, finalmente, trasladou a ferida ao Complexo Hospitalario Universitario de Lugo (HULA).
Ademais do persoal sanitario e dos efectivos de salvamento e rescate, acudiron os axentes da Garda Civil de Tráfico, que informan que a vía estaba despexada porque o vehículo quedou completamente fóra da estrada.
