Liberado un empregado de Alcoa en Cervo tras quedar atrapado nun accidente
Investigan por que se produciu un desprendemento de bauxita que o cubriu ata a cintura
A empresa di que é traballador dunha contrata e non sufriu lesións graves
Imaxe exterior da fábrica de San Cibrao
Os servizos de emerxencia liberaron este sábado, tras un accidente laboral, un empregado da factoría de Alcoa en San Cibrao, no concello de Cervo.
Segundo informa o 112, o sinistro produciuse ás dúas da mañá, cando o afectado quedou atrapado por unha chea de pedras que o cubrían ata a cintura.
Fontes da empresa aseguran que o afectado é un traballador dunha contrata da planta que limpaba un depósito cando se produciu un desprendemento de bauxita, roca da que se extrae o aluminio.
O home quedou coas pernas atrapadas polo que se activaron os protocolos de emerxencia da fábrica. Os Bombeiros de Viveiro e o GES de Cervo liberárono e o 061 trasladouno ao hospital de Burela.
Alcoa asegura que non se apreciaron lesións de gravidade, pero están a investigar o sucedido. Ademais, agradece a asistencia e o traballo dos grupos de emerxencia.
.png)
