Lestedo celebra o día grande da súa Festa da Filloa, que chega á súa 43ª edición

As filloeiras non paran de fumear en Lestedo no día grande da súa festa. Desde as 8 da mañá, preparan unhas dúas mil filloas por hora.

"Estamos a tope: un unta, outro bota o amoado, damoslles a volta e sacámolas para que poidades comer o antes posible"

"Cunha máquina a presión para sacar as máximas filloas e que saian frescas"

Prepáranas para tódolos gustos: doces, salgadas, recheas, e tamén á pedra.

"Riquísimas, son as mellores". "Ricas, comín moitas". "Eu xa as probei e mira as que levo". "Eu é o primeiro ano que veño, está moi ben esto". "Se foran gratis, comeriamos moitas máis", din varias asistentes á festa.

En Lestedo Levan 43 anos organizando esta festa, declarada de Interese Turístico Nacional. A celebración convertiuse en todo un emblema da parroquia.

"Todo o mundo colabora, tanto maiores como pequenos, é un pracer. Levamos xa 43 anos, o da filloa xa é un sentimento", di unha voluntaria"

"Ao ser declarada como Festa de Interese Turístico Nacional vén moita máis xente, hai máis publicidade e hai tamén máis traballo. Hai que botar 15 días preparando todo", di un colaborador.

Durante toda a xornada, as filloas poderán degustarse no campo da Feira de Lestedo. Pola noite seguirá a festa.