Lesmes: "Antes do verán debería facerse a renovación do CXPX"
"É imprescindible que se faga e que se faga xa", dixo en Vigo o presidente do Supremo e do Consello Xeral do Poder Xudicial
O presidente do Tribunal Supremo e do Consello Xeral do Poder Xudicial, Carlos Lesmes, dixo este martes que na súa opinión "antes do verán debería facerse a renovación" do Consello Xeral do Poder Xudicial (CXPX), tras tres anos e medio en funcións.
"Por suposto" antes desa data estival debería liquidarse esa "anomalía constitucional" e, para iso, cristalizar o acordo entre Goberno e PP para poñer remedio á situación, dixo a preguntas da prensa en Vigo, onde acompañou o rei Filipe VI na inauguración da Cidade da Xustiza.
"Véñoo dicindo reiteradamente. A renovación é imprescindible que se faga e que se faga xa. Non pode un órgano constitucional como o Consello levar tres anos e medio, que leva, en situación de prórroga", afirmou o presidente do CXPX.
A solución, opinou, debe materializarse canto antes. "Por suposto antes do verán debería facerse a renovación", concluíu Lesmes.
