Laureano Oubiña volve ao banco dos acusados, procesado por traficar con cocaína en Asturias
Canda ao histórico narcotraficante vanse xulgar outras 21 persoas supostamente integrantes dunha organización responsable da introdución de máis de catro quilos de cocaína no Principado
Laureano Oubiña en Vilagarcía en 2023 (Europa Press/Adrián Lago)
A Audiencia Provincial de Oviedo celebra desde este martes a vista oral contra vinte e dous procesados por introducir en Asturias máis de catro quilos de cocaína en 2017, entre eles o galego Laureano Oubiña.
A Fiscalía pide penas individuais que oscilan entre os tres anos e medio e os dezaseis anos de cárcere; no caso de Oubiña a petición é de catro anos e nove meses de prisión.
Segundo o escrito de acusación provisional formulado polo Ministerio Fiscal, en xullo de 2017 polo menos cinco dos procesados formaban parte dunha organización que se dedicaba ao tráfico de drogas en Asturias, principalmente de cocaína.
O grupo traballaba de forma xerarquicamente ordenada e por baixo dos máximos responsables outro grupo de integrantes realizaba funcións de distribución de estupefacientes e recadación a distribuidores a maior escala, quen á súa vez, contaban coa súa propia rede de vendedores minoritarios.
Os feitos que serán xulgados a partir de hoxe remóntanse ao 8 de novembro de 2017, cando foi interceptado na Autovía do Cantábrico, á altura de La Caridad (El Franco), un vehículo da organización no que se atoparon, baixo o tapizado, catro paquetes plastificados de cocaína dun peso de 4,1 quilos cunha pureza do 78,5 %, droga valorada en case 165.000 euros.
Ademais desta droga, nos diversos rexistros practicados durante a operación comisouse cocaína por valor superior aos 27.000 euros, xunto con resina de cánnabis, heroína, diñeiro en efectivo e armas en perfecto estado e funcionamento, entre outros moitos efectos. Os acusados non dispoñían de licenza para a súa tenza.
A Fiscalía engade que as anotacións contables incautadas á organización reflicten "grandes movementos de adquisición de droga para a súa posterior distribución".
