Lanzan un can ao refuxio de Pontevedra por riba dun valado de dous metros
Fixérono de madrugada e moi lonxe da entrada para evitar seren gravados polas cámaras de seguridade
O animal recupérase na protectora
As penas por abandono dun can en condicións que poñan en risco a súa vida contemplan multas de ata 50.000 euros
O abandono do can, un pastor belga dun ano de idade, produciuse no refuxio Os Palleiros de Pontevedra.
O animal foi lanzado por enriba do valado da protectora, que ten unha altura de dous metros e medio. Ocorreu de noite, cando non quedaba xa ninguén no refuxio e os autores o fixeron no punto máis afastado da porta para evitar seren gravados polo sistema de cámaras de seguridade.
O estado do can era moi fráxil
Os responsables de Os Palleiros atoparon o can á mañá seguinte con varias feridas no pescozo, xa que o animal se pelexou con outro que se atopaba xa dentro do recinto. A pelexa non lle causou feridas de moita gravidade.
"Chegaron as miñas compañeiras, porque chegan ás oito da mañá e foron a ese patio porque ese patio se emprega pola noite para algún can que se estea sociabilizando, non? Entón, o botaron aí "Non sei se virían en coche ou virían camiñando, non o sabemos. O único que sabemos é que o can apareceu no valado, e o tiveron que tirar por enriba porque non hai outra forma de acceder a ese patio", así o relataba unha das traballadoras da protectora Os Palleiros.
O can pasou un día ingresado no veterinario por mor do seu fráxil estado de saúde e agora continúa a súa recuperación na protectora.
"Por sorte está todo ben, estivo un día ingresado no veterinario por precaución, porque a mordida foi aquí un pouco no pescozo, pero nada mais", explicou a traballadora.
Lembran que as mascotas son un membro máis da familia e que, mesmo na peor das situacións, se pode atopar unha solución segura para darlles un novo fogar.
"A xente dime: non podo facerme cargo ou o que sexa. Eu digo, mándame fotos, difundímolo e despois vemos a mellor forma de axudar ese animal. Non hai por que chegar a eses extremos, nin deixalos atados nin abandonados nin nada", así o lamentaba o persoal da protectora Os Palleiros de Pontevedra.
Se ben non é o primeiro abandono destas características que lles toca vivir, dende a protectora Os Palleiros pensaban que esta sorte de prácticas violentas co animal quedaran no pasado.
"Levamos como uns dez anos así mais ou menos, e oxalá que siga así, que non o tomen outra vez por costume. A todos nos pode dar un golpe a vida e non poder facernos cargo, pero hai outras formas, existen as protectoras, existe a xente que coida cans, as residencias, difundir por redes sociais para ver se o queren, se cho poden adoptar... Hai un montón de formas e non facelo así dese xeito, porque ao can puido custarlle a vida".
As penas polo abandono dun can en condicións que poñan en risco a súa vida contemplan multas de ata 50.000 euros e traballos en beneficio da comunidade, aínda que as sancións poden ser maiores se o caso de maltrato animal implica violencia ou asañamento.
