Jorge Prado gaña en Portugal e rompe o dominio de Gajser
Dominou a primeira rolda e xestionou a segunda xusto por detrás do líder do mundial
Rubén Fernández acabou na sexta posición a primeira rolda e foi noveno na segunda
Primeiro triunfo da temporada para Jorge Prado, que fixo do Grande Premio de Portugal a súa casa e rompeu a serie vitoriosa de Tim Gajser, o mellor nas tres primeiras probas do Mundial.
A primeira rolda foi para Jorge Prado. O español non foi o máis rápido na primeira volta pero puido coller o mando case ao principio e xa non o soltou ata o final. Aproveitou o erro de Gajser no comezo para marchar a carón de Bogers. Manexou unha vantaxe de 2 - 3 segundos e chegou á meta na primeira posición.
Por detrás, Gajser remontou e acabou no terceiro posto, a menos de tres segundos de Prado. Rubén Fernández tamén tivo que recuperar desde o posto número 13 e acabou na sexta praza logo dun espectacular adiantamento a Jonass.
A segunda carreira comezou con Prado á fronte, pero Gajser púxose detrás do piloto galego. Mediada a proba o esloveno conseguiu pasar a Prado e dominou con solvencia. Xusto por detrás, Prado xestionaba a vantaxe co terceiro clasificado consciente de que un segundo posto lle permitía acadar o premio gordo. Houbo que sufrir porque Coldenhoff recortou diferenzas pero acabou a sete décimas.
Rubén Fernández volveu saír moi atrasado e custoulle máis remontar que na primeira carreira. Pagou os problemas físicos da caída na xornada de clasificación do sábado.
