Jeff Chabot (Stuttgart): "Sabemos o que nos espera ante o Celta"

O defensa alemán Jeff Chabot, xogador do Stuttgart, sinalou este martes que o seu equipo chega “nun bo momento” ao debut europeo ante o Celta, ao que reciben este xoves tras derrotar o St. Pauli (2-0) na Bundesliga.

“Estamos a desexar que chegue o partido, o primeiro da liga Europea. Vimos dunha vitoria importante, na que mantivemos a portería a cero e iso dános confianza. Sabemos que podemos facelo e miramos a semana con optimismo”, manifestou aos medios oficiais do club xermano.

Chabot, que gañou un 85 por cento dos seus duelos no partido do pasado venres ante o conxunto de Hamburgo, espera un duelo de máxima dificultade ante os de Claudio Giráldez, aos que xa se enfrontaron durante a pretemporada, nun duelo marcado pola intensa choiva.

“Aquel partido foi unha boa proba ao principio da fase de preparación, un partido bastante duro e con moitos duelos. Sabemos o que nos espera, teremos que dar o cen por cento para derrotar o Celta”, avisou.

O defensa alemán admitiu que esta semana é “especial” para el porque despois do duelo europeo ante o equipo galego mediranse ao F. C. Köln, club no que militou dúas tempadas, a primeira cedido polo Spezia italiano, antes de asinar polo Stuttgart.

“O xoves temos o partido da liga Europea e logo o de visitante contra o meu anterior club, o Colonia. Sen dúbida, esta é unha semana especial para min e espéroa con moitas ganas”, comentou Chabot, un dos habituais no once de Sebastian Hoene.