Israel mata polo menos a 24 gazatís que esperaban distribución de alimento no sur de Gaza

Polo menos 24 palestinos morreron este martes e decenas deles foron feridos por disparos do exército israelí mentres esperaban a repartición de comida na zona da Al Mawasi, en Rafah, dixo o Ministerio de Sanidade gazatí; mentres, o exército israelí confirmou que disparara. "Ata o momento, 24 mortos e decenas de feridos chegaron aos hospitais, incluído un en estado crítico", confirmou Sanidade, que dixo que se trata de cifras provisionais doutro masacre contra quen esperaba a entrega de axuda na zona designada para a súa distribución en Rafah.

Os cadáveres, entre eles un menor de 17 anos, están a ser trasladados do Hospital de Campaña da Cruz Vermella, en Rafah, ao Hospital Naser en Khan Yunis, confirmaron a EFE sanitarios locais. Pola súa banda, nun comunicado, o exército israelí recoñeceu abrir fogo arredor de medio quilómetro do punto de distribución contra varios sospeitosos que avanzaban cara ás tropas de forma que representaban unha ameaza, pero non achegou probas. "Hoxe (martes), durante o desprazamento da multitude polas rutas designados cara ao punto de distribución de axuda, situado a medio quilómetro, as tropas identificaron varios sospeitosos que se dirixían cara a eles, desviándose dos camiños de acceso designados", dixo o exército.

"As tropas realizaron disparos de advertencia e, ao non lograr que se retirasen, houbo disparos máis de preto contra algúns sospeitosos que avanzaban cara ás tropas", engadiu, dicindo que se estaban investigando os detalles do suceso e as posibles vítimas. A Fundación de Axuda para Gaza, apoiada polos EUA, que abre desde hai oito días un punto onde entrega caixas con comida só no sur, insuficientes para unha poboación de 2,1 millóns de gazatís, dixo que non se fai responsable da área fóra dos seus centros, que segue sendo unha zona de guerra activa. "Esta área atopábase moi afastada do noso centro de distribución seguro e da nosa zona de operacións. Recoñecemos a difícil situación e recomendamos a todos os civís que permanezan no corredor seguro ao desprazarse aos nosos centros de distribución", engadiu a oenegué, a pesar de que os disparos se produciron a medio quilómetro do punto ao que forzan aos gazatís a desprazárense se queren tentar comer.

Xa o pasado domingo, de madrugada, polo menos outros 31 palestinos morreron e máis de 170 foron feridos por disparos a apenas un quilómetro deste mesmo punto de distribución de alimento en Rafah, confirmaron Sanidade e o Comité Internacional da Cruz Vermella (ICRC), que dirixe o hospital de campaña en Rafah. O exército israelí negou a súa responsabilidade, e un oficial militar confirmou que as tropas dispararon tiros de advertencia preto do centro.

62 mortos en tres días

O alto comisionado da ONU para os dereitos humanos, Volker Türk, denunciou este martes os ataques de Israel contra desesperados palestinos que tentaban acceder "a exiguas cantidades de axuda alimentaria en Gaza" nos tres últimos días e que causaron polo menos 62 mortos e centos de feridos. Hamas eleva esa cifra a 102 vítimas.