Investigado un menor en Sarria por darlle un pastel con cánnabis a unha compañeira que acabou no hospital

A Garda Civil imputou como investigado por un suposto delito contra a saúde pública un menor de idade que é sospeitoso de elaborar un pastel con cánnabis que probou unha compañeira no patio dun centro escolar de Sarria, o que fixo que ela acabase no hospital.

Segundo a información difundida este mércores pola comandancia de Lugo, a investigación policial púxose en marcha o pasado mes de febreiro, cando a Garda Civil recibiu a denuncia polos feitos sucedidos nese centro escolar de Sarria.

Na denuncia comunicábase que unha alumna consumira “un pastel tipo brownie no patio” do centro escolar. Pouco despois comezou a atoparse indisposta, polo que foi trasladada ao momento de Atención Continuada (PAC) de Sarria para recibir asistencia médica urxente, aínda que finalmente foi evacuada ao Hospital Universitario Lucus Augusti (HULA) en Lugo.

As probas médicas realizadas á menor determinaron a presenza de THC no seu organismo, substancia psicoactiva presente no cánnabis, circunstancia que motivo o inicio dunha investigación para esclarecer os feitos e determinar a súa orixe.

No transcurso desa investigación, os axentes da Garda Civil encargados do caso puideron determinar as circunstancias que derivaron na intoxicación da menor, así como “o modus operandi e a identidade da persoa relacionada cos feitos”.

Paralelamente, intensificouse a vixilancia nas inmediacións dos centros escolares da localidade, o que deu lugar á tramitación de diversas denuncias por tenza de substancias estupefacientes por parte de menores de idade.

As dilixencias, xunto co menor investigado, foron postas ao dispor da Fiscalía de Menores de Lugo.