Investigadas tres persoas por realizar cortas sen permiso nos montes de Oleiros
Trátase de dous veciños de Cedeira e un de Oleiros que simulaban pertencer a unha empresa dedicada á corta de árbores
A Garda Civil comisou varias toneladas de madeira que, presuntamente, fora subtraída
Os axentes impútanlles ademais varios delitos de furto, danos, estafa e falsidade documental
A Garda Civil investiga tres persoas, dous veciños de Cedeira e outro de Oleiros, por realizar talas sen permisos nos montes deste último municipio, e polos supostos delitos de furto, danos, estafa e falsidade documental.
Segundo informaron fontes da Comandancia da Coruña, a investigación, bautizada como operación Glóbulos, iniciouse tras a denuncia de catro veciños de Oleiros, que foron advertidos polo Concello de que os seus montes foran cortados a principios de ano sen os permisos necesarios. Os veciños descubriron que alguén cortara nos terreos sen o seu coñecemento nin consentimento.
A raíz destas denuncias, a Garda Civil iniciou as pescudas e detectou diversas irregularidades documentais. Finalmente, logrou identificar as tres persoas supostamente responsables, que actuaban como unha empresa dedicada á tala de árbores.
No marco do operativo os axentes incautáronse de varias toneladas de madeira que, presuntamente, fora subtraída. Os feitos foron postos en coñecemento do xulgado.
.png)
