A vaga de roubos nos Mallos das últimas semanas leva a intranquilade a este barrio coruñés
O último asalto foi esta noite nunha cafetería
Os ladróns rompen os vidros para poder acceder aos negocios e roubar as caixas rexistradoras
Completamente roto estaba esta mañá o cristal da porta da cafetería Taberna 23, situada na rúa peonil Ángel Senra. "Ás catro e media da mañá rompéronnos a porta. Levaron a caixa das moedas e a impresora de tíckets", explica a propietaria do negocio.
Unha veciña que ía traballar viu o ladrón e rapidamente alertou a policía. "Ía vestido de negro e cunha máscara. Levaba algo negro como un monitor".
Pero o caso é que a noite anterior os delincuentes xa fixeran das súas na mesma zona. Entraron nun comercio dedicado á venda de cigarros electrónicos. "Romperon o cristal coa tapa da rede de sumidoiros, contra as dúas e media da noite, e levaron o caixón da caixa rexistradora", comenta a empregada do negocio.
Catro horas despois, roubaron nunha imprenta situada a escasos metros. Os comerciantes quéixanse de que están a sufrir unha importante vaga de roubos desde hai case dúas semanas.
Impotentes, piden máis vixilancia policial para poder frear todos estes asaltos e recuperar a tranquilidade no barrio.
