Inspeccionan unha granxa de visóns na Coruña con animais feridos e cadáveres

 A Consellería do Medio Rural da Xunta inspeccionou unha granxa de visóns en Abegondo despois de ter coñecemento dunha denuncia por animais feridos e cadáveres.

A asociación Animal Respect and Defence for the Environment (ARDE) informou de que presentou unha denuncia tras detectar irregularidades na granxa.

Fontes da entidade aseguraron que, tras unha investigación, comprobaron que "moitos visóns están enfermos e viven entre sucidade extrema".

Os ecoloxistas indicaron que a granxa "é ilegal" por autorizarse despois de que o Tribunal Supremo prohibise a instalación de novas granxas de visóns.

ARDE esixiu o "peche e prohibición" de granxas peleteiras en España.

Fontes da Consellería do Medio Rural explicaron que xa se realizou unha inspección da explotación para supervisar o estado das súas instalacións.

"A partir de agora, tendo en conta os informes derivados da dita inspección, adoptaranse as medidas que correspondan, que no caso de existir incumprimento poderían incluír a incoación do oportuno expediente sancionador, coas sancións correspondentes", agregan.

A Xunta lamenta que este tipo de denuncias "non se trasladen inmediatamente aos servizos veterinarios oficiais" para que poidan actuar coa máxima celeridade.

"A Consellería do Medio Rural non tivo constancia formal de ningunha denuncia por este tema, que coñeceu a través dos medios de comunicación", engade e insta calquera persoa ou colectivo a denunciar estas cuestións.

Ademais, a Asociación Española de Granjas de Visón (AGAVI), que manifestou que descoñecía a existencia desta granxa, comprometeuse a "seguir de preto as inspeccións e controis que realicen as autoridades de Sanidade Animal".

Tamén abrirá unha investigación interna para comprobar a veracidade das denuncias e adoptar as medidas oportunas.

Animalistas piden unha auditoría independente

A Fundación Franz Weber cualificou de "vomitivas" as imaxes e reclamou unha auditoría independente, pois entende que a Xunta mostra o seu apoio a este sector, que de acordo cunha normativa europea non poderá continuar coa cría de visón americano desde agosto de 2027.

"O anuncio de inspeccións inmediatas non pode ocultar que durante meses se deu unha situación de maltrato animal e de riscos ambientais, polo que se preguntan onde estaban os servizos de vixilancia", agrega a entidade.

O coordinador de campañas da ONG, Rubén Pérez, considera que esta inspección "roza o insulto á intelixencia" despois de meses sen que transcendese "sanción ou reproche administrativo ningún".

“Nun contexto no que as empresas téxtiles referenciais no planeta renuncian ao uso de peletería, resulta moi difícil entender o interese do Goberno galego por protexer un 'lobby' que non achega nada á nosa comunidade, máis ben maltrato animal, contaminación e risco de contaxio pandémico", remata.