Ingresado un menor tras realizar un salto de altura no peirao de Malpica

Na tarde deste luns, un cativo de 10 anos sufriu un golpe na cabeza cando saltou dende o peirao de Malpica, a unha altura de 5 metros. O rapaz impactou de cheo contra o descanso das escaleiras.

Foi sobre as 17:00 cando un veciño alertou ao 112 do ocorrido. Varias testemuñas que viron o sucedido explicaron que o rapaz saltou dende o coñecido como muro do gas e esvarou.

"Quedou inconsciente e sangraba polos oídos", declarou un veciño.

Os servizos de emerxencias despregáronse pola zona para atender o ferido. Acudiron a Garda Civil, Protección Civil, a Policía Local e os bombeiros.

Hai que lembrar que está prohibido bañarse nas zonas portuarias aínda que non haxa sinalización.

"Non se debería facer, pero fíxose toda a vida, aí están os cativos todo o verán..., sempre", aseguraba unha veciña.

O pequeno, de 10 anos e de posible orixe alemá, continúa ingresado no Hospital Materno Infantil da Coruña.