Indra prevé incrementar este ano o seu persoal en Galicia en 170 perfís de "alta capacitación tecnolóxica"

A directora xeral de Recursos Humanos de Indra Group, María del Carmen Moneva, anunciou que a empresa espera incrementar este ano o seu persoal en Galicia en 170 persoas, con perfís de "alta capacitación tecnolóxica".

Así o sinalou ante os medios de comunicación antes de participar no acto de presentación do Plan de Crecemento e tracción de talento do grupo en Galicia, levado a cabo na sede de Afundación de Vigo na mañá deste venres.

Moneva reivindicou que Indra xa dispón dun amplo persoal na rexión galega, con máis de 1.680 profesionais nos seus 14 centros, que se incrementarán nunhas 170 persoas este 2026.

Ela subliñou que o grupo ten o foco posto no crecemento no ámbito da defensa e en xerar emprego "tecnolóxico de alta calidade". Preguntada polos perfís máis buscados para este ano, Moneva falou da importancia de captar enxeñeiros, perfís tecnolóxicos e de formación profesional, alén de todos aqueles relacionados coa fabricación de compoñentes electrónicos.

A responsable de Recursos Humanos dixo que o obxectivo "é desenvolver capacidades críticas na comunidade", onde a empresa xa impulsa iniciativas como a ampliación do centro de enxeñería especializado en guerra electrónica e a fábrica de chips de Sparc en Vigo ou o centro de ensaios de voo no aeródromo de Rozas.

Por iso, o plan de crecemento de Indra en Galicia estenderase a todas as súas liñas de negocio: Defensa e Seguridade, Tráfico Aéreo, Mobility, Espazo, IndraMind, Minsait e áreas como dixitalización ou intelixencia artificial, prevendo a incoporación de perfís de todos os niveis e especialización.

"O crecemento previsto reforzará a Indra Group como un dos principais tractores de emprego industrial e tecnolóxico da comunidade. Para iso, estreitaremos a nosa colaboración coas universidades, centros de formación profesional ou institucións públicas de xeración e promoción de emprego, e traballaremos en plans conxuntos que aseguren a atracción e capacitación do talento galego en áreas críticas", engadiu Moneva.

Neste sentido, destacou a importancia da colaboración con administracións públicas e centros de formación e universidades á hora de poder captar os perfís necesarios. Ao respecto, subliñou a necesidade de traballar para que estes centros implanten estudos para formar en ámbitos necesarios para a industria.