Inditex fai os 25 anos da súa saída a bolsa con 4.500 tendas en todo o mundo

Hoxe cúmprense 25 anos da saída a bolsa de Inditex, unha operación que marcou un antes e un despois na historia empresarial española e que situou a compañía de Arteixo entre os grandes xigantes europeos. 

Ás once e media da mañá do 23 de maio de 2001, unha gran pantalla anunciaba unha rareza: unha empresa téxtil saía a bolsa nun IBEX daquela dominado por bancos, eléctricas, construtoras e empresas de telecomunicacións.

Ao momento histórico asistiron o conselleiro delegado do grupo, José María Castellano, e directivos como Juan Carlos Rodríguez Cebrián. 

"Grazas a todos pola atención que nos prestastes e pola confianza que depositastes na nosa compañía", dicía Castellano aquel día histórico en declaracións á prensa.

Faltou Amancio Ortega. O fundador, sempre discreto, evitou os focos e deixou falar os números.

Preto de 4.500 establecementos

Situámonos hai xusto un cuarto de século. A compañía con sede en Arteixo contaba con pouco máis de mil tendas en 33 países e saía ao mercado valorada en arredor de 9.000 millóns de euros.

No seu primeiro día no parqué, a demanda das accións superou vinte e seis veces a oferta e os títulos disparáronse por riba do 22%.

Vinte e cinco anos despois, con preto de 4.500 establecementos en todo o mundo, Inditex é a empresa máis valiosa de España. O seu valor en bolsa creceu un 1.600% e os seus beneficios multiplicáronse por dezaoito.

Baixo a batuta de Pablo Isla, a matriz de Zara reforzou a súa expansión internacional e consolidou a súa transformación dixital.

Dimensión cultural e proxección internacional

O camiño continuou en 2022 co relevo histórico de Marta Ortega na presidencia e Óscar García Maceiras como conselleiro delegado, nunha transición de continuidade que non alterou a confianza inversora.

Nesta nova etapa, a compañía reforzou a súa dimensión cultural e a proxección internacional da Coruña e de Galicia.

Iniciativas como a Fundación MOP converteron a cidade nun escaparate para grandes exposicións de fotografía e arte contemporánea, ampliando a influencia de Inditex máis aló da moda e dos escaparates.