Incidentes entre afeccionados de Xénova e Deportivo
Segundo as informacións chegadas de Italia, afeccionados xenovenses atacaron a desprazados deportivistas
As primeiras investigacións falan de certos símbolos exhibidos sen autorización dos ultras do Xénova
@Genova24IT
Producíronse incidentes na previa do amigable que van disputar o Xénova e o Deportivo. Segundo as primeiras informacións, o que ocorreu foi que os ultras locais foron a polos afeccionados do Deportivo pola exhibición de simboloxía e bandeiras non autorizadas. Os desprazados serían membros dos Riazor Blues.
Os ultras do equipo 'Rossoblu' chegaron en masa, disfrazados e armados con paus, perseguindo dende a Via San Bernardo ata a zona de San Giorgio buscando a deportivistas, que se atopaban nos bares da Piaza della Erbe.
No camiño, producíronse lanzamentos de petardos e bombas de fume, ademais dunha estampida de xente polas rúas típicas do ocio nocturno xenovés.
O Deportivo pronunciouse sobre a situación nun comunicado. Nel condena calquera acto de violencia, intimidación ou alteración da orde pública ocorrido e di que "este tipo de comportamentos non representan os valores do RC Deportivo nin do deportivismo".
Tamén explican no comunicado que colaborarán coas autoridades e organismos pertinentes, ademais de que adoptarán medidas se se confirma a participación de persoas vinculadas á contorna do club.
