Incáutanse en Portugal de 4.200 quilos de cocaína oculta en caixas de bananas

A Policía Xudicial de Portugal informou da aprehensión no país de preto de 4.200 quilos de cocaína oculta en caixas de bananas.

A droga atopárona nun barco procedente de Colombia que atracou no peirao de Setúbal, 50 quilómetros ao sur de Lisboa.

É un dos maiores alixos de cocaína de que se incautaron no país veciño nos últimos anos. A operación non foi casual. É o resultado de meses de investigación que contou con información de corpos policiais de terceiros países.

A droga é de gran pureza e detrás do envío estaría o Clan do Golfo, unha das organizacións de narcotraficantes máis activas de Colombia.

Non se produciron detencións, pero segundo a Policía Xudicial a operación supón un duro golpe financeiro para o grupo criminal.

Portugal non é alleo á entrada masiva de cocaína procedente de Latinoamérica que se está producindo tamén en España e outros puntos da Unión Europea.  Só nos tres primeiros meses deste ano, foi interceptada en Portugal tanta droga coma en todo o ano pasado, case 17 toneladas.