Incautan case mil quilos de cocaína de alta pureza agochados entre sacos de cebolas en Valencia

Logra fuxir, en plena redada policial, o presunto líder dunha trama criminal dedicada ao narcotráfico. Foi en Valencia. Os axentes pillaron en flagrante o que é un dos grupos de traficantes máis activos da zona do Levante. Traían droga do Perú a España a través do porto de Valencia e, desde alí, movían a droga en camións por estrada. Agochaban a cocaína entre sacos de cebolas.

Case mil quilos de cocaína de alta pureza atopou a Policía dentro de varios camións, en bolsas negras de plástico, camuflados entre sacos de cebolas. Estaban nunha nave industrial de Valencia, listos para saír por estrada, en camións dunha empresa de transportes que non levantaba sospeitas, a Portugal. Antes, trouxéranos desde O Perú, por mar, en colectores que entraron polo porto de Valencia. Hai once detidos, seis foron arrestados cando os axentes entraron por sorpresa na nave onde agochaban a droga. Un dos traficantes, o que fuxiu, é o presunto líder da trama criminal.

Hai unha orde de detención internacional sobre el. Está en busca e captura. É un narco de Valencia cun amplo historial delituoso. Un irmán seu, xemelgo, fora detido tamén por narcotráfico en Colombia hai un par de anos, despois de ser un dos traficantes de droga máis buscados de toda Europa.