Inaugurada a maior estación de carga de coches eléctricos da Autovía do Noroeste

A estación de servizo El Raso, situada na Autovía do Noroeste (A-6) á altura do municipio zamorano de Villalpando, a uns 230 quilómetros de Madrid, converteuse na maior infraestrutura de recarga de vehículos eléctricos desa autovía, principal vía de comunicación por estrada entre Galicia e a capital de España.

A nova electrolineira dispón de vinte puntos de recarga ultrarrápida de ata 400 quilowatts de potencia e con ela son xa máis de douscentos os puntos de carga instalados en Castela e León pola empresa promotora do proxecto, a palentina Zunder.

Na actualidade, esta empresa do sector das electrolineiras ten outros quince proxectos para instalar 110 novos puntos de recarga que están en fase de construción na comunidade e que supoñen un investimento duns vinte millóns de euros, segundo detallou o director executivo e fundador de Zunder, Daniel Pérez.

A estación de carga de Villalpando aspira a converterse nun punto clave para a mobilidade eléctrica nunha das principais rutas de longo percorrido do país, ao facilitar a conexión entre Galicia, Madrid e o norte de Portugal.

A electrolineira permite que algúns vehículos eléctricos, cunha parada de vinte minutos, poidan continuar o camiño ata Galicia ou ata Madrid, segundo o sentido, sen máis paradas, nunha autovía como a A-6 que rexistra unha intensidade media diaria de ata 45.000 vehículos nalgúns dos seus tramos.