Identificados os catro membros da familia de Marín falecida nos terremotos de Venezuela

O Concello de Marín confirmou este venres a identificación dos corpos dos catro membros da familia residente na localidade pontevedresa que permanecían desaparecidos tras os terremotos rexistrados en Venezuela. 

Nun comunicado, o goberno local informou do falecmento de Lía, Ulises, Adela e Yosvany, unha familia "moi querida" no municipio, e expresou o seu pésame aos familiares e achegados, así como á comunidade educativa do Colexio da Inmaculada, onde estudaban os dous menores, e ao Club de Hóckey de Marín, co que estaban estreitamente vinculados. 

"Hai momentos especialmente duros como pobo, e hoxe é un deles", sinala o Concello na súa mensaxe. 

A familia viaxara a Venezuela ao remate do curso escolar para sorprender os seus achegados e atopábanse na rexión da Guaira, unha das zonas afectadas polos dous terremotos, de magnitude 7,5 e 7,2, rexistrados nos últimos días. 

Rueda expresa a súa "profunda tristeza" 

O presidente da Xunta de Galicia, Alfonso Rueda, expresou a súa "profunda tristeza" este venres despois de que se identificasen os corpos dos catro membros dunha familia de orixe venezolana e residente no municipio pontevedrés de Marín.

A través dunha mensaxe no seu perfil da rede social 'X', o titular do Executivo autonómico lamentou o falecemento de Adela Taberneiro e Yhosvany Hernández, así como o dos seus dous fillos menores, Lea e Ulises.

O mandatario galego quixo trasladar todo o seu "cariño" aos seres queridos das vítimas como á localidade de Marín, que se viu "especialmente golpeada por esta terrible noticia".

Profunda tristeza pola tráxica perda de Adela Taberneiro e Yhosvany Hernández, e dos seus fillos Lía e Ulises, no terremoto de Venezuela. Todo o meu cariño aos seus seres queridos e a todo Marín, especialmente golpeado por esta terrible noticia

https://t.co/cqwXm53r8b

— Alfonso Rueda (@AlfonsoRuedaGal) August 7, 2026