Greenpeace interrompe unha operación de pesca e libera quenllas capturadas por un palangreiro de Vigo

Activistas de Greenpeace interromperon unha operación de pesca industrial con palangre de superficie dun buque de Vigo que pescaba en augas do Pacífico Sur, preto de Nova Zelandia. Incautaron case 20 quilómetros de liña de pesca e máis de 200 anzois, segundo informou a propia organización nun comunicado.

Os activistas a bordo do Rainbow Warrior lograron liberar máis dunha ducia de animais vivos, entre eles quenllas azuis e marraxos, algúns en perigo de extinción. Greenpeace presentou esta semana unha proposta de Modelo Alimentario Sostible (MAIS) "para que non se volvan repetir imaxes como estas", sinalaron, e lembraron que este informe expón, entre outras cousas, unha reestruturación da frota pesqueira.

"A pesca industrial arrasa os nosos océanos. Estes barcos aseguran que a súa pesca obxectivo é o peixe espada ou o atún, pero os nosos activistas foron testemuñas de como estas frotas industriais capturaban quenlla tras quenlla, incluídos quenllas en perigo de extinción, en só media hora", explicou a responsable de océanos en Greenpeace España, Marta Martín-Borregón.

Con este informe, buscan eliminar de forma progresiva a dependencia das importacións e as artes de pesca industriais como o arrastre, palangre de superficie e atuneiros cerqueiros, así como a acuicultura intensiva de especies piscívoras, polos elevados impactos que xeran estas pesqueiras sobre os ecosistemas mariños.

"Se queremos asegurar o futuro do sector pesqueiro debemos cambiar o modo actual de produción dependente das importacións e as artes de pesca industriais. A clave é apostar pola pesca de baixo impacto ambiental e alto valor social, con menores capturas pero que permitan preservar os caladoiros a futuro, contribuíndo á economía local", incidiu Martín-Borregón.

Entre o 9 e o 13 de xuño terá lugar a Conferencia das Nacións Unidas sobre os Océanos (UNOC) en Niza, xusto despois do Día Mundial dos Océanos o 8 de xuño, e Greenpeace pide aos líderes mundiais que protexan de "esta destrución sen sentido" o 30 % dos océanos do mundo para 2030.