Grecia aproba ampliar a xornada laboral ata un máximo de 13 horas diarias

O Parlamento de Grecia aprobou este xoves un proxecto de lei presentado polo Goberno conservador que estende a xornada laboral no sector privado ata un máximo de 13 horas diarias, unha reforma que provocou duras reaccións por parte dos sindicatos e a oposición de esquerdas.

O proxecto foi aprobado grazas aos votos a favor da conservadora Nova Democracia, o partido con maioría absoluta do primeiro ministro Kyriakos Mitsotakis, mentres que toda a oposición votou en contra, excepto o esquerdista Syriza que se retirou da votación para "non legalizar co seu voto" o que cualificou como unha "lei monstruosa".

O Goberno defende que a xornada laboral de 13 horas é opcional, só afecta o sector privado e pode aplicarse un máximo de 37 días ao ano.

No debate previo á votación a ministra de Traballo, Niki Kerameos, defendeu a lexislación tras cualificala como unha reforma "positiva e progresista", que aumentará os postos de traballo e incrementará a rede de protección dos traballadores.

"Debemos facilitar o desenvolvemento empresarial porque sen empresas non se crean postos de traballo e sen empresas este país nunca vivirá desenvolvemento" sinalou a ministra.

Kerameos recalcou tamén que, ademais da ampliación da xornada laboral, a lexislación contempla unha serie de medidas que aumenta a protección dos traballadores, como a ampliación dos beneficiarios e as axudas por maternidade.

O Goberno destaca que, a pesar desta ampliación, mantense o límite máximo de 48 horas semanais e 150 horas extra anuais, e que traballar ata 13 horas terá unha bonificación do 40 % por hora extra.

"Prohíbese explicitamente que o empregador che obrigue, despida, ou discrimine de calquera forma", recalcou Kerameos, no caso de que o traballador se negue a traballar esas horas extra.

O principal partido de oposición, o socialdemócrata Pasok, acusou o Goberno este mércores de facer "retroceder o país ao século XIX" en canto a dereitos laborais.

Os pasados días 1 e 14 de outubro Grecia viviu dúas folgas xerais que paralizaron o país convocadas polos principais sindicatos do sector público e privado, ADEDY e GSEE, para esixir que o Goberno retire o proxecto.

Os sindicatos cualifican de "mentira" que a ampliación da xornada sexa "opcional", xa que, argumentan que no mercado laboral grego o traballador non ten ningún poder de negociación e o empresario pode despedir o empregado atopando calquera outra escusa, sen que teña que xustificalo.

Os economistas explican a medida pola falta de traballadores no sector de servizos e a hostalería, especialmente durante a tempada turística de verán.

O Goberno de Mitsotakis transformou o mercado laboral grego nun dos máis flexibles de Europa.

Desde xullo de 2024 os traballadores da industria, o comercio retallista, a agricultura e algúns servizos están obrigados a traballar seis días á semana se o seu empregador o esixe. O soldo dese sexto día recibe unha bonificación do 40 %.

Os traballadores en Grecia traballan moito máis que en calquera outro país europeo, con máis de 1.886 horas ao ano, segundo a axencia de estatísticas europea, Eurostat, aínda que teñen unha menor produtividade e o segundo menor poder adquisitivo na UE, só por diante de Bulgaria.