A Organización de Consumidores e Usuarios advirte os condutores que adquiriron a baliza luminosa V16 de sinalización antes do verán de que probablemente non estea homologada conforme ao anexo do Real Decreto 2822/1998, que fixa o seu uso obrigatorio a partir do 1 de xaneiro de 2026.
Unha enquisa de OCU revela que a gran maioría das balizas adquiridas entón custaron menos de 40 euros, o prezo mínimo que tiñan os modelos conformes á normativa (agora son máis baratas e poden adquirirse desde 30 euros).
O uso de modelos non homologados é sancionable a partir de xaneiro cunha multa de 80 euros. Ademais, supón un risco para o condutor, xa que este tipo de balizas non transmite a localización do vehículo avariado ao centro de xestión de tráfico para avisar da inmobilización outros condutores.
Neste sentido, a DXT lembra que cada ano falecen unha media de 25 persoas atropeladas ao saír do seu vehículo avariado ou accidentado.
OCU recomenda ás persoas que xa teñen unha baliza V16 e ás que a vaian adquirir que comproben previamente que o etiquetado inclúe a advertencia «conectada á DXT 3.0»; que a carcasa leva inscrito un número de homologación; e, para maior seguridade, que está incluída na listaxe de dispositivos homologados que ofrece a web da DXT.
OCU segue detectando a venda en liña de balizas luminosas V16 de sinalización non homologadas, aínda que agora en moita menor medida. Tamén observou unha baixada do prezo mínimo dos modelos homologados: de 40 euros antes do verán a 30 euros na actualidade. En calquera caso, insta a DXT a vixiar a comercialización de balizas V16 non homologadas e a asegurarse da súa retirada nas plataformas de venda en Internet.
.jpg)
