Consulta aquí todos os festivos de 2026, incluídos os locais

O Diario Oficial de Galicia publicou este xoves a resolución que dá publicidade ás festas laborais de carácter local para 2026 en Galicia, inhábiles para os efectos laborais, retribuídas e non recuperables. A normativa estatal, lembra o comunicado, establece 14 festas anuais de ámbito nacional non recuperables, remuneradas e de carácter obrigatorio. Delas, dúas son elixidas por cada concello.

Nas cidades, os festivos locais marcados na Coruña son o 17 de febreiro (Martes de Entroido) e o 7 de outubro (Festividade do Rosario); en Ferrol, o 7 de xaneiro (Festividade de San Xiao) e o 6 de abril (Nosa Señora de Chamorro); e en Santiago, o 17 de febreiro e o 14 de maio (Ascensión). En Lugo, os días escollidos son o 17 de febreiro e o 5 de outubro (San Froilán), mentres que en Ourense serán o 17 de febreiro e o 11 de novembro (San Martiño). En Pontevedra, as datas son o 18 de febreiro (Mércores de Cinsa) e o 11 de xullo (San Bieito), mentres que Vigo terá o 28 de marzo (Festa da Reconquista) e o 17 de agosto.

Dos doce festivos restantes, á marxe dos locais, nove son de carácter obrigatorio e non substituíbles, a non ser que coincidan en domingo. Son o 1 de xaneiro, Venres Santo, 1 de maio, 15 de agosto, 12 de outubro, 1 de novembro, 6 de decembro, 8 de decembro e 25 dese mesmo mes. En 2026 hai dous festivos nacionais que coinciden en domingo, e son o 1 e 6 de novembro, substituídos polo 19 de marzo e 24 de xuño.

Os outros tres festivos de carácter nacional son opcionais, é dicir, poden ser substituídos polas comunidades autónomas: é o caso do 6 de xaneiro, que en Galicia nunca se cambia salvo que caia en domingo; o Xoves Santo (que en 2026 celebrarase o 2 de abril e que na comunidade galega normalmente non se modifica) e, ademais, dáse ás autonomías a posibilidade de escoller como opcional entre o 19 de marzo e o 25 de xullo. A Xunta decántase polo segundo, ao ser o Día de Galicia.

Podes consultar o calendario laboral provincial en que se determinan as festas laborais de carácter local correspondentes aos concellos da respectiva provincia, A Coruña, Lugo, Ourense e Pontevedra.