Rueda reivindica unha PAC forte ante o novo escenario internacional
O xefe do Goberno galego apuntou que estes fondos mobilizaron un total de 1.000 millóns en Galicia desde a súa posta en marcha hai 35 anos
Avanzou que xa está publicada a convocatoria de Leader para o próximos tres anos, cun orzamento total de 28,7 millóns
O presidente da Xunta destacou este venres que os fondos Leader da Unión Europea mobilizaron un total de 1.000 millóns de euros en Galicia desde a súa posta en marcha hai 35 anos, un apoio "moi importante" para o desenvolvemento rural galego, que defendeu que se manteña na nova Política Agraria Común (PAC).
Rueda participou hoxe nun acto conmemorativo destes fondos europeos nunha visita ao municipio coruñés de Vedra , onde destacou que os fondos europeos permitiron apoiar "8.000 proxectos, a consolidación de 7.300 postos de traballo e a creación doutros 5.300".
Así mesmo, indicou que en febreiro pasado foi publicada a nova convocatoria de Leader para o próximos tres anos, ata 2028, cun orzamento total de 28,7 millóns de euros. Esta é "a maior convocatoria de financiamento destas axudas ata a data", sinalou o xefe do Goberno autonómico e precisou que a importancia deses fondos radica no seu impacto real no territorio.
Permiten pon en marcha de proxectos turísticos, ampliar instalacións empresariais, diversificar a actividade económica no ámbito rural, habilitar edificios emblemáticos ou prestar atención social, comentou.
"En definitiva, trátase de dar vida ao campo e garantir que os 313 municipios teñan un equilibrio para que todos poidan seguir vivindo onde queiran", afirmou.
Neste sentido, enxalzou o labor dos 24 Grupos de Desenvolvemento Rural de Galicia e o seu papel na xestión deste programa europeo de financiamento. Os GDR son asociacións público-privadas sen ánimo de lucro formadas por entidades dos ámbitos económico, social, cultural, veciñal ou profesional da zona que participan na distribución de subvencións, a avaliación de proxectos ou o asesoramento aos promotores.
Rueda insistiu en pedir o mantemento do programa Leader na nova PAC. Neste contexto, defendeu que este novo marco financeiro conte cun "financiamento suficiente, con fondos garantidos e diferenciados para o desenvolvemento rural".
"Os fondos deben manterse, seguen sendo necesarios", recalcou e avogou por unha "xestión descentralizada" deste tipo de axudas, así como por unha "redución da burocracia" na súa distribución.
Rueda sinalou que a semana pasada transmitiu persoalmente estas demandas na súa reunión co comisario europeo de Agricultura e Alimentación, Christophe Hansen, e indicou remitilo igualmente ao Ministerio de Agricultura, Pesca e Alimentación, co obxectivo de defender os intereses de Galicia.
