Grande afluencia de xente para participar no ensaio da vacina do virus sincipital

Os hospitais públicos de Galicia están a rexistrar esta fin de semana unha grande afluencia de persoas para participar no ensaio clínico Sincigal da vacina do virus respiratorio sincitial (VRS).

A cidadanía galega de 18 anos en diante respondeu á chamada extraordinaria feita pola Consellería de Sanidade para que participasen no citado estudo, co que se pretende comprobar se o anticorpo é eficaz en adultos e se poden previr hospitalizacións.

Só na xornada do sábado participaron 5.400 persoas en toda Galicia. A máxima taxa acadouse na área da Coruña e Cee. 

Na súa primeira fase, o estudo estaba destinado ás persoas maiores de 60 anos, pero ampliouse á poboación maior de idade dando prioridade aos grupos de risco, entre os que se inclúe o persoal sanitario por mor do seu maior nivel de exposición a este virus.

As persoas que acudiron aos hospitais recibiron Abrysvo, vacina dos laboratorios Pfizer xa aprobada polas autoridades sanitarias para previr o VRS, e coa que o estudo Sincigal pretende demostrar na práctica a redución de ingresos hospitalarios na poboación galega.

Antes do inicio este sábado da xornada extraordinaria de vacinación, un total de 19.400 persoas xa participaran no ensaio clínico Sincigal.

Estratexia

O estudo enmárcase na estratexia galega de saúde pública pragmática, que integra a investigación clínica co sistema sanitario real para xerar evidencias útiles que permitan optimizar a toma de decisións sobre políticas de vacinación.

A través da Dirección Xeral de Saúde Pública, a Xunta iniciou no 2023 un programa pioneiro de inmunización contra o Virus Respiratorio Sincitial en lactantes con resultados moi positivos, xa que se demostrou nunha porcentaxe moi elevada que a poboación infantil enferma menos.

Do que se trata agora co ensaio Sincigal é comprobar se a inmunización é igual de efectiva en persoas adultas para así incluíla no calendario de vacinas.