Goberno e comunidades analizan rebaixar a corentena para os contaxiados por covid

A incidencia do coronavirus dispárase en España ata os 1.360 casos por cada 100.000 habitantes, un máximo nunca visto. Os contaxios aumentaron case un 50% respecto á semana anterior. O positivo é que non se trasladan con igual forza á presión hospitalaria. A maioría dos casos son leves e isto leva ao Goberno e ás comunidades a reformular algunhas actuacións.

Hoxe estudarán a posibilidade de reducir as corentenas dos contaxiados. Madrid foi a primeira en pedilo. Sumáronse Andalucía e Castela e León. O Goberno non o descarta e os expertos entenden que se abra o debate.

Ao mesmo tempo case todas as comunidades adoptaron novas restricións para frear os contaxios. Nove quedan sen as celebracións de Fin de Ano, con límites de horarios para a hostalería e ocio nocturno.

Madrid, unha das catro comunidades con incidencia superior a 2.000, mantén as uvas na Porta do Sol. Cren que o risco de contaxio é moi baixo se se cumpren as medidas de seguridade.

O que si valoran é atrasar a volta ás aulas despois do Nadal e dende hoxe abren a autocita para vacinar os nenos a partir de 5 anos.

13 comunidades pediron a Defensa equipos móbiles do Exército para acelerar as campañas de vacinación.