Claudio Giráldez: "Xogamos sen cerebro"
O técnico celeste lamentou a falta de claridade do Celta nos últimos metros
Claudio Giráldez, adestrador do Celta, asegurou este luns, tras o empate fronte ao Xetafe (1-1), que se marcha do Coliseum coa sensación de perder " dous puntos" e criticou a precipitación do seu equipo durante os últimos vinte minutos, cando xogou en superioridade numérica pero atacou "sen cerebro e sen acerto técnico".
"Vou coa sensación de perder dous puntos. Acabamos con superioridade numérica e, cando atacamos con cerebro en igualdade, estivemos moi ben. Foi imposible para eles roubarnos a pelota e gañamos vantaxes ante o seu bloque baixo", analizou.
Giráldez lamentou a falta de claridade do Celta nos últimos metros e sinalou o gol de Satriano como exemplo dos pequenos erros que están a penalizar ao seu equipo.
"Agora mesmo estamos nese momento no que non vemos a portería con facilidade, non atopamos posibilidades de tiro e fáltanos acerto en situacións sinxelas. O resumo é o primeiro gol que nos fan, cun balón que nós mesmos metemos dentro da área. Son pequenos detalles nos que se nos van os partidos", explicou.
O técnico mostrouse especialmente descontento coa resposta dos seus xogadores despois da expulsión de Zaid Romero no minuto 67.
"Tamén me pregunto por que cun máis non fomos capaces de interpretar o partido. Deixamos de facer os xiros, de superar a súa segunda liña de presión e de buscar os intervalos. Xogamos sen cerebro... E sen cerebro e sen acerto técnico...", engadiu.
