Claudio Giráldez terá que reinventar a defensa ante o Elxe

O adestrador do Celta, Claudio Giráldez, está obrigado a reinventar a súa liña defensiva para o partido deste domingo contra o Elxe debido á ausencia de dúas dos seus piares, o internacional sueco Carl Starfelt e o madrileño Marcos Alonso. O central nórdico segue sen recuperarse da lumbalxia coa que regresou de xogar coa súa selección nacional a repesca para o Mundial, mentres que o seu compañeiro terá que cumprir ciclo de cartóns amarelos.

Con este panorama, Giráldez terá que compoñer a súa cuarta defensa do curso sen os dous veteranos, cos que xa non puido contar no dobre compromiso ligueiro contra o Xirona e na derrota fronte ao Deportivo Alavés en Vigo.

O canteirán Carlos Domínguez, que precisamente xogou o seu último partido fronte ao conxunto vasco, aparece como a opción máis probable para substituír a Marcos Alonso, xa que o serbio Mihailo Ristic deixou de contar para o técnico. Ao posto de Starfelt optan Yoel Lago, que vén de realizar dous penaltis ante Barcelona e Vilarreal, o ganés Joseph Aidoo e mesmo Álvaro Núñez, que podería ter outra oportunidade ante o seu exequipo.