Gin tonic do país fronte á escaseza de xenebras internacionais
O desabastecemento das marcas máis consumidas podería ser unha oportunidade para os destilados galegos
O Nadal ten como obxectivo conquistar os consumidores máis próximos
Os amantes do gin tonic poden estar tranquilos. Aínda que é posible que neste Nadal non atopen a súa marca de cabeceira, quédalles por descubrir un amplo universo, o das xenebras galegas.
"É unha oportunidade para medrar no mercado nacional e que a xente que aínda non probou a xenebra galega se anime", explica José Albela, xerente de Galician Original Drinks.
Na súa destilería de Vedra naceu Nordés, a primeira e máis coñecida xenebra galega. Despois viñeron outras moitas marcas locais, con propostas para todos os gustos e un elemento en común, a calidade dos destilados.
"En Galicia témolo todo, hai auga, cereais e unha longa tradición de destilados". di José Albela.
O sector nota a escaseza de botellas e tapóns e teñen dificultades para chegar aos mercados internacionais. Por iso, neste Nadal o obxectivo é conquistar os consumidores máis próximos.
