Gardas Civís de Camariñas colocan un banco turístico e róubanlles as ferramentas

Xa se sabe que todos os bancos con vistas teñen o título de 'mellor banco do mundo'. Pero o de Xaviña, en Camariñas, non aspira a tanto. É só unha iniciativa altruísta da Garda Civil e en que colaboraron a comunidade de montes e un carpinteiro da vila. Sen máis obxectivos que contribuír ao ben común. 

"Fixémolo unha tarde en que librabamos os tres compañeiros. Subímolo e estivemos mirando as mellores vistas que podiamos obter", conta Manuel Estrada. Esas vistas son, sen dúbida, para sentar e relaxarse. Cabo Vilán, o cemiterio dos Ingleses, a duna rampante do Monte Branco. O solpor tamén é para fotografar. 

O banco está moi cerca do Camiño dos Faros, unha ruta costeira de sendeirismo de 200 quilómetros que é reclamo turístico.

A paisaxe desde o banco abarca desde Muxía ata a praia do Trece

Roubo de ferramenta

Para decidir a localización do banco os axentes tiveron algunha dúbida. Foron unha primeira vez, pero tiveron dúbidas. "Como non nos gustou, levamos o banco e deixamos o material agochado. Un nivel, un trade, unha maceta e un cortafríos". 

Aos tres días volveron para instalalo definitivamente pero as ferramentas xa non estaban. Quizais o ladrón non era consciente de estarlle roubando á Garda Civil, pero agora ten un problema.

O banco xa está no seu sitio e cunha lenda detrás: "Non digas nada, gózao e déixao quedar". En referencia á paisaxe... e ao banco, por suposto.