Gardacostas de Galicia estrea patrulleira de última xeración con base en Portonovo

O presidente da Xunta, Alfonso Rueda, presidiu este xoves en Vilanova de Arousa a botadura da nova patrulleira, chamada Punta Faxilda, do Servizo de Gardacostas, unha embarcación de última xeración, que pode navegar a gran velocidade sen perder a estabilidade grazas á tecnoloxía. O xefe do Goberno galego destacou a aposta da Xunta pola modernización da frota deste servizo.

Punta Faxilda terá a súa base en Portonovo e operará entre as rías de Vigo e Arousa. É unha das 23 embarcacións, 9 delas patrulleiras, coas que conta Gardacostas de Galicia, ademais de dous helicópteros, vehículos e 140 efectivos para dar servizo os 365 días do ano.  Dende a creación deste servizo autonómico, hai 30 anos, levan salvadas 1.800 vidas.

O salvamento foi a súa función inicial, pero agora traballan sobre todo na loita contra a contaminación e o furtivismo. Só o ano pasado fixeron case 10.000 inspeccións, comisaron 36.000 aparellos e incautáronse de 28.000 quilos de especies mariñas.

Alfonso Rueda destaca o seu papel na protección da economía da costa e lembrou que dende o 2018 xa renovaron seis patrulleiras, ás que se sumará unha igual a Punta Faxilda a finais deste ano.