Galicia e outras trece comunidades defenden ante a UE a súa xestión do lobo, con críticas ao Goberno

Galicia xunto con outras trece comunidades e cidades autónomas remitiron unha carta á Comisión Europea (CE) na que defenden o "rigor técnico" dos seus plans de xestión do lobo e denuncian o que entenden como "actitude arbitraria" do Gobierno central para declarar o estado de conservación da especie como desfavorable.

A carta foi remitida á comisaria europea de Medio Ambiente, Resiliencia Hídrica e Economía Circular Competitiva, Jessika Roswall, por Galicia, Andalucía, Cantabria, A Rioxa, Murcia, Comunidade Valenciana, Aragón, Canarias, Estremadura, Baleares, Madrid, Castela e León, Ceuta e Melilla, segundo informou este venres a Xunta de Galicia.

Na misiva aseguran que o procedemento de información pública aberto polo Ministerio para a Transición Ecolóxica do informe sexenal 2019-2024 sobre o lobo é un trámite "non previsto regulamentariamente", que "parece pretender convencer a opinión pública" de que as comunidades non foron capaces de achegar con rigor todos os datos e a información necesarios para elaborar correctamente o documento.

Na documentación dese procedemento inclúense expresións como "valoracións unilaterais" e "carecedoras de validación científica algunha" que, segundo denuncian as autonomías asinantes, suxiren que a información recompilada polas comunidades non é fiable, que os seus sistemas de seguimento carecen de rigor e cuestionan a solvencia técnica do persoal desas administracións.

Nese sentido, consideran "contraditorio" que o novo trámite só se aplique á documentación do lobo e non se cuestione o traballo realizado para outras especies que, din, fíxose co mesmo procedemento, participantes e criterios.

Os datos trasladados polas comunidades ao Ministerio "teñen base tanto na literatura científica como na realidade dos datos do territorio", aseguran.

Tamén afirman que o Goberno central non respectou o procedemento de comunicación e diálogo para a validación formal dos arquivos remitidos nin convocou a Conferencia Sectorial de Medio Ambiente para debater esta cuestión.

As comunidades denuncian que, en canto aos criterios de análises, o Executivo central alude a "supostas pautas establecidas polas autoridades comunitarias que, ou ben son falsas ou ben sementan dúbidas sobre unha suposta inconsistencia dos datos autonómicos".

E citan exemplos diso, como a obrigación de alcanzar cincocentas mandas nunha rexión biogeográfica para que o estado de conservación sexa considerado favorable.

Tamén consideran que o Ministerio fai "interpretacións subxectivas" sobre a xurisprudencia do Tribunal Superior de Xustiza da Unión Europea.

Piden información sobre as declaracións de Morán

As autonomías asinantes solicitan información á comisaria sobre as declaracións do secretario de Estado de Medio Ambiente, Hugo Morán, nas que dixo que entregou el mesmo os datos do lobo á CE en 2025.

E lembran que a propia comisaria sinalou en abril que seguía esperando o informe sexenal do lobo -que debía remitirse antes do 31 de xullo de 2025- e que, por ese atraso, iniciouse a apertura dun procedemento de infracción.

O Ministerio abriu o pasado 6 de maio o período de información pública do informe sexenal do lobo e o prazo de alegacións finalizou esta semana cun desacordo absoluto entre os grupos ecoloxistas e as comunidades autónomas 'lobeiras' respecto á protección que debe darse a esta especie.

As catorce comunidades e cidades autónomas que remitiron a carta á comisaria europea xa anunciaron a mediados de maio accións xudiciais para esixir ao Goberno que cumpra a normativa nacional e europea sobre conservación do lobo.