Galicia chega a Fitur con optimismo sobre a candidatura da Ribeira Sacra a ben mundial

O conselleiro de Cultura, Lingua e Xuventude, José López Campos, destacou este mércores que a Xunta afronta “con optimismo e confianza” a recta final da candidatura da Ribeira Sacra a Patrimonio da Humanidade.

Fixo estas declaracións durante unha presentación da candidatura no expositor de Galicia na Feira Internacional de Turismo (Fitur), xunto a representantes do Consorcio de Turismo Ribeira Sacra. É a única candidatura que presenta España, e as administracións son optimistas. 

López Campos mostrouse “máis que satisfeito” co traballo realizado ata o momento polos técnicos do Goberno galego e o Ministerio de Cultura, ademais de avanzar os últimos pasos para chegar “coas máximas garantías e a mellor estratexia posible” á avaliación final, que terá lugar en xullo deste ano.

“Estamos convencidos do valor deste territorio e, por iso, confiamos en que alcance o merecido recoñecemento”, sinalou López Campos sobre a candidatura ‘Ribeira Sacra: Paisaxe da auga’.

Ademais, aproveitou para destacar que o Executivo autonómico cumpriu “rigorosamente cos trámites, documentación e tempos esixidos, e segue facéndoo cos últimos procedementos”, en referencia aos previstos para este semestre.

Dese modo, lembrou que o pasado mes de novembro unha delegación da Xunta e do Ministerio de Cultura entrevistouse en París cun comité de expertos da Unesco para ampliar e aclarar cuestións do expediente presentado, “que serán presentadas antes do 27 de febreiro”.

López Campos avanzou que mañá -día 22 de xaneiro- reunirase co ministro de Cultura, Ernest Urtasun, co obxecto de abordar o estado da candidatura e establecer unha folla de ruta conxunto para os próximos meses.

“Estamos, de novo, ante pasos clave, aos que nos enfrontamos coa tranquilidade e seguridade que dá contar cunha candidatura madura, sólida e arroupada non só polo Goberno central, senón por toda a Comunidade, os veciños, axentes locais e institucións da zona”, asegurou López Campos.

O delegado do Goberno en Galicia, Pedro Blanco, destacou tamén nesa presentación en Fitur que a candidatura “é un proxecto estratéxico para o Goberno de España, que conecta plenamente co modelo de turismo que queremos proxectar ao mundo: máis respectuoso, máis auténtico e comprometido coa súa xente e coa súa paisaxe”.

Subliñou “o esforzo e o compromiso firme do Goberno para alcanzar este fito histórico" e expresado a súa confianza en que moi pronto a Ribeira Sacra "reciba o recoñecemento como Patrimonio Mundial”, froito do impulso colectivo e do traballo coordinado de todas as administracións e axentes implicados.

Pedro Blanco profundou na importancia da colaboración institucional entre o Goberno de España, a Xunta de Galicia, as administracións locais e os axentes sociais das provincias de Lugo e Ourense.

É “a base imprescindible para presentar unha candidatura sólida, rigorosa e capaz de facerse realidade”, resolveu. 

Galicia chega a Fitur cunha ampla oferta, con 50 presentacións de produtos e destinos.