Galicia reforzará as linguas e as matemáticas en primaria

Galicia reforzará o próximo curso as linguas e as matemáticas en primaria. Para a ESO e bacharelato haberá un impulso das humanidades e das competencias técnicas.

Estes son os cambios que vai introducir a Xunta de Galicia no ensino para adaptar á nosa comunidade autónoma a nova lei educativa estatal, a LOMLOE.

• Educación Infantil 

O único cambio será engadir un cuarto bloque de contidos sobre o coñecemento do contorno social.

• Primaria

Manteranse as notas numéricas dos alumnos ademais da avaliación literal. Haberá dúas horas máis por semana para  Lingua Castelá e Lingua Galega. Reforzarase a materia de Matemáticas. Haberá unha alternativa á materia de Relixión.

• Secundaria

Seguirá habendo notas numéricas, e a repartición das materias que se impartirán en galego, castelán ou inglés virá determinado pola Xunta.

No primeiro e segundo curso impartirase Tecnoloxía e Dixitalización, unha materia que contará cun forte peso das matemáticas aplicadas e as ciencias técnicas. E engadirase unha materia de libre disposición que poderá servir para o reforzo das competencias que vexan necesarias.

En terceiro de Secundaria ofreceranse como optativas Cultura Clásica, Educación Dixital, Oratoria, unha segunda lingua estranxeira. E en cuarto curso as optativas serán Cultura Clásica e Oratoria.

Non se poderá cursar dúas veces a mesma materia. E aqueles que, chegados a cuarto da ESO, non se decanten por ningunha destas optativas, poderán escoller unha das optativas dependentes do Ministerio de Educación. 

• Bacharelato

A gran novidade da LOMLOE é a introdución dunha modalidade xeral con maior abano de optativas. Poderá cursarse en 36 institutos de toda Galicia, maioritariamente nas cidades e áreas metropolitanas.

A outra novidade é que aumenta unha hora o tempo destinado a Educación Física.

Optativas de Bacharelato

En primeiro serán Anatomía Aplicada, Cultura Científica, Antropoloxía, Literatura Galega do século XXI e Actualidade, Tecnoloxías da Información e a Comunicación e a primeira parte dunha segunda lingua estranxeira.

En segundo serán Métodos Estatísticos e Numéricos, Psicoloxía, Patrimonio e Sociedade de Galicia, Tecnoloxías da Información e a Comunicación II e a segunda parte dunha segunda lingua estranxeira.

Os contidos definitivos das materias optativas de Bacharelato publicaranse antes do 25 de xullo.

O conselleiro de Educación Román Rodríguez  sinalou que se intentou facer a adaptación cos mínimos cambios posibles.