Francia prohibe as 'abaya' nas escolas por ser unha túnica de identificación relixiosa

Francia vai prohibir as abayas nas escolas públicas en nome do laicismo, xa que o Goberno considera que estas túnicas amplas que cobren o corpo das mulleres, da cabeza aos pés ocultando as formas, orixinarias de países musulmáns, son un vestido de identificación relixioso.

"A escola non é o lugar para facer proselitismo relixioso", subliñou este luns o portavoz do Goberno, Olivier Véran, para xustificar unha medida avanzada horas antes polo ministro de Educación, Gabriel Attal.

Véran lembrou que nas escolas públicas aplícase o principio do laicismo e a abaya "evidentemente é un vestido relixioso", aínda que o Consello Francés do Culto Musulmán (CFCM) pretenda o contrario.

O domingo pola noite, Attal explicara esta prohibición con carácter xeral que xa podían decidir os directores de centros escolares por propia iniciativa, porque eses mesmos directores "esperan regras claras a nivel nacional".

O titular de Educación fixo fincapé en que en Francia "a escola da República construíuse arredor de valores extremadamente fortes, e en particular o laicismo".

"O laicismo -engadiu- non é unha limitación, é unha liberdade. É a liberdade de forxar unha opinión. Para min o laicismo na escola é algo moi claro: cando se entra nunha clase non se ten que poder distinguir a relixión dos alumnos ao miralos. Por tanto, decidín que non se poderá seguir levando a abaya".

Attal ten intención de reunirse esta semana cos directores dos centros escolares para explicar a súa directiva.

Unha lei de 2004 proscribe nas escolas e liceos públicos os vestidos ou signos cos que os alumnos "manifestan de forma ostensible unha pertenza relixiosa". O obxectivo da lei nese momento era sobre todo o veo islámico.

O CFCM, un órgano de representación dos musulmáns ante os poderes públicos, pronunciouse en xuño á calor do debate sobre a proscrición da abaya nos centros escolares afirmando que non é un vestido musulmán.

"Na tradición musulmá, que nós defendemos, un vestido sexa o que sexa non é un signo relixioso en si", sinalaba o CFCM, que dicía temer que esa polémica dese lugar a unha estigmatización dos musulmáns.