O Constitucional francés anula a prohibición de redes sociais a menores de 15 anos

O Consello Constitucional de Francia censurou este venres o principal artigo da lei adoptada o mes pasado, pioneira en Europa, para prohibir as redes sociais aos menores de 15 anos por considerar que as súas disposicións supoñen un ataque "desproporcionado" á liberdade de expresión.

No seu ditame, o Constitucional tamén xustifica a anulación dese artigo cardinal da lei porque estima que con el non se previron garantías legais suficientes para respectar o dereito á privacidade.

Os maxistrados recoñecen que hai unha esixencia constitucional para protexer "o interese superior do neno" e que iso permite, por tanto, limitar os menores o acceso ás redes sociais, pero non da forma en que se lexislou.

Na sentenza critícase o carácter xeral da prohibición 

Na resolución póñese o acento en que esa liberdade de expresión "é unha condición da democracia e unha das garantías do respecto doutros dereitos e liberdades".

No caso da lei que o Parlamento adoptou de forma definitiva o pasado 21 de xullo para impedir o acceso aos menores ás redes sociais, o Consello Constitucional critica o carácter xeral da prohibición.

Ademais, cuestiona que estean cubertos por esa prohibición todos os menores de menos de 15 anos, sen que se avalíe o risco para eles en función "da súa idade, do seu grao de madurez e da súa situación familiar", o que significa que os pais ou os que teñan a autoridade parental deses nenos ou adolescentes non poden decidir o levantamento da prohibición, limitar o seu alcance ou autorizar o acceso a certas redes sociais.

O Goberno de Macrón traballa xa nunha nova redacción da lei 

Nunha primeira reacción ao revés do Consello Constitucional, o presidente francés, Emmanuel Macron, que foi o gran promotor da lei, indicou que encargou ao seu primeiro ministro, Sébastien Lecornu, que traballe no prazo máis breve nunha nova redacción "xuridicamente robusta" que teña en conta o ditame da censura, así como "o marco europeo".

O Elíseo tamén fixo fincapé en que "a determinación do presidente da República para sacar adiante esta reforma de aquí á primavera de 2027 segue sendo total".

A lei agora censurada instauraba a prohibición de acceso aos menores de 15 anos aos servizos de redes sociais ofrecidos por plataformas dixitais, coa exclusión de determinados portais, como as enciclopedias en liña (de tipo Wikipedia), así como de plataformas de desenvolvemento e distribución de software libre ou os proxectos educativos de código aberto.