Ferraz ratifica a Carmela López para presidir a Deputación de Lugo e o PP critica o "pacto da vergoña"

A dirección federal do Partido Socialista ratificou na tarde deste luns a alcaldesa de Burela, Carmela López, como candidata socialista á presidencia da Deputación de Lugo; mentres que o PP volveu criticar o que cualifica como un "pacto da vergoña" entre socialistas e nacionalistas tras a denuncia por suposto acoso sexual presentada na canle interna do PSOE contra o que era presidente, José Tomé -suspendido da militancia socialista-.

Os tres partidos políticos con representación na Deputación Provincial de Lugo ultiman os preparativos para a celebración este mércores, ás 12.00 horas, do pleno extraordinario en que se elixirá o novo presidente ou presidenta do organismo tras a dimisión de José Tomé en decembro.

Este luns fontes socialistas sinalaron que Ferraz avala a elección realizada pola xestora do PSOE de Lugo nos primeiros días do ano, o que deu pé ao comezo das conversacións co BNG, que se pecharán esta tarde de luns.

Aínda que falta unha confirmación final, a intención de ambos os partidos é continuar co pacto de Goberno que lles permitiría conservar o poder provincial fronte ao partido con maior número de votos, o PP. E para iso necesitarán ambos o si tamén de José Tomé, agora deputado non adscrito tras a súa saída das siglas do PSOE.

Pola súa banda, os deputados do Grupo Provincial Popular aproveitaron este luns, a dous días da celebración do pleno, para reivindicar un cambio de aires no Goberno provincial, "un novo tempo, aire fresco e deixar fóra condutas reprobables".

Para iso, confirmaron que presentarán candidatura, encabezada por Antonio Ameijide, contra a da socialista Carmela López, que terá que contar cos votos socialistas, co de Tomé e cos do BNG para reeditar a maioría.

Rodeado de todos os deputados populares, o portavoz Ameijide asegurou que a reedición dun acordo entre PSOE e BNG supoñería, ao seu xuízo, "selar o pacto da vergoña" e manter unha situación de goberno "condicionada por conflitos internos e decisións tomadas na sombra".

Afirmou que José Tomé segue á fronte das decisións provinciais, "con reunións en cafeterías en lugar de en despachos".

O BNG, "cómplice"

O portavoz do PP foi moi claro na súa crítica contra o PSOE pero tamén contra o BNG, ao que acusou de ser cómplice "dun acosador sexual e dunha encubridora". Criticou que "mentres non asistía ás xuntas de goberno porque estaba Tomé, dedicábase a arranxar os convenios por detrás".

Así, explicou que na última Xunta de Goberno da Deputación, celebrada o 30 de decembro, unha hora antes da dimisión de Tomé, aprobáronse máis de 1,6 millóns de euros destinados a concellos con presenza do BNG ou a áreas xestionadas por esta formación.

Ameijide interpretou esta decisión como unha mostra de que, mentres publicamente se escenificaban desacordos, "os pactos millonarios pechábanse nos despachos".

Neste punto, o responsable nacionalista, Efrén Castro, insistiu no "carroñerismo político" do Partido Popular, acusando a Ameijide de "descoñecer a xestión provincial", xa que, como asegurou, estes convenios pactáronse nas últimas semanas nin se fixeron dun día para outro. "Non houbo ningunha negociación, foi o funcionamento normal do Goberno", concluíu.

O BNG apoiará a investidura da alcaldesa de Burela

O BNG manifestou a súa disposición para dar continuidade no goberno da Deputación de Lugo tras a reunión mantida esta tarde de luns co grupo socialista.

Na reunión concretáronse as conversacións desenvolvidas nos últimos días, tras as que o BNG confirmou, ademais do seu apoio á investidura, "a súa vontade de manter o actual marco de colaboración no goberno provincial".

Desde o BNG insistiron tamén na importancia de preservar a institución provincial fronte á estratexia do Partido Popular, ao que acusan de "utilizar unha denuncia por acoso sexual como arma política contra a formación nacionalista e como pretexto para tentar acceder a un goberno que, segundo sinalaron, non logrou nas urnas nas pasadas eleccións municipais".