Dimite a socialista Margarita López, a edil de Igualdade de Monforte de Lemos
A súa saída suporá a entrada na corporación de Miguel Tomé López, fillo do alcalde, o seguinte na lista do PSdeG-PSOE aos comicios municipais
A oposición pediulle en decembro a dimisión por deixación de funcións tras coñecerse a denuncia por acoso sexual presentada contra o rexedor na canle interna do partido, acusación que el nega
A concelleira de Muller e Igualdade da localidade lucense de Monforte, a socialista Margarita López, presentaba este luns a súa dimisión, que se formalizou nun pleno celebrado a pasada noite.
"Non deixo a loita, non deixo os valores que me inculcou unha nai que hoxe ten 91 anos e necesítame física e emocionalmente ao seu lado. Só cambio o lugar desde o que seguir defendendo unha sociedade máis xusta, máis libre e máis humana", asegurou para subliñar que o seguirá facendo desde o "PSOE", o partido que protagonizou "os maiores avances sociais" de todo tipo e, "en especial", "en materia de igualdade e violencia de xénero".
O alcalde agradeceu o seu labor e sinalou que a concelleira ten agora unha vida "familiar distinta" que lle "impide dedicarse como lle gustaría" ás súas funcións. Ademais, dixo que, a pesar da súa renuncia, seguirá traballando e colaborando co equipo de goberno.
López, que alega razóns persoais para deixar a acta de edil, será substituída polo seguinte na lista do PSOE, posto que corresponde a Miguel Tomé, fillo do actual rexedor.
Miguel Tomé xa foi concelleiro no anterior mandato nesta localidade e ocupou o número catro da candidatura do PSdeG ao Parlamento de Galicia pola provincia de Lugo, por detrás do secretario xeral, José Ramón Gómez Besteiro; da responsable de Organización, Lara Ménez; e da exalcaldesa de Trabada, Mayra García.
Dende a oposición municipal, Esperta Monforte pedira a finais de decembro a dimisión de Margarita López, á que acusaba de inacción e abandono de funcións, logo das denuncias por suposto acoso sexual que pesan contra o alcalde monfortino, petición á que se sumaran o PP e o BNG.
José Tomé negou a veracidade das denuncias, pero decidiu renunciar á presidencia da Deputación Provincial de Lugo e solicitou a súa suspensión de militancia no PSOE.
O xefe de filas do PSdeG, José Ramón Gómez Besteiro, limitouse a trasladar o seu "máximo respecto pola decisión tomada" que, conforme indicou, se debe a "motivos persoais". Na actualidade, o alcalde José Tomé goberna como non adscrito co apoio do resto de concelleiros do PSOE, cos que conta con maioría absoluta.
Este tema, ademais, saltou este martes no Parlamento de Galicia. Así, coa renuncia como pano de fondo, a secretaria xeral do PPdeG e deputada autonómica, Paula Prado, non desaproveitou a súa intervención nun debate do Parlamento para subliñar o que definiu como "o novo feminismo" do PSOE, á vez que afeou ao BNG acceder a "cogobernar" con socialistas no que cualifica de "pacto porco".
