Remata o Debate de Política Xeral coa aprobación de 51 propostas, 11 por unanimidade

Remata o Debate de Política Xeral cun balance de 51 propostas aprobadas, 11 delas por unanimidade. Unhas cifras que supoñen un maior nivel de consenso ca en anos anteriores.

Foron as propostas relacionadas cos anuncios que fixo o presidente da Xunta o primeiro día do debate: máis facilidades para acceder a unha vivenda pública, extensión do Bono Coidado ou esa próxima reforma da Atención Primaria.

Con Democracia Ourensana, o PP chegou a 9 acordos que teñen que ver coa mellora dos servizos públicos nos pequenos concellos. Cos socialistas destaca o acordo para aumentar o profesorado de apoio para alumnos con necesidades especiais. Co BNG tan só houbo unha coincidencia: ambos grupos aprobaron pedirlle ao Goberno central que a Xunta tome parte na xestión dos fondos europeos asignados a Galicia.

O PPdeG, con maioría no Parlamento, non conseguiu pechar importantes acordos cos grupos da oposició. 

O BNG reitera as súas críticas ao plan de baixas laborais da Xunta

 A viceportavoz do BNG, Olalla Rodil, instou o PP e o presidente da Xunta, Alfonso Rueda, a "rectificar" e pedir "desculpas" aos traballadores galegos ao entender que coa súa proposta para afrontar as baixas laborais considera que "son todos uns vagos e maleantes".

Na súa intervención este venres no debate sobre o estado da autonomía, Rodil, criticou que "a medida estrela" e "o gran anuncio" fose o devandito plan fronte ás baixas, "nun momento así no que o máis importante sería que Galicia tivese un goberno audaz, con visión de futuro, con ambición, capaz de impulsar as grandes transformacións" que a comunidade precisa.

A nacionalista avisou de que "detrás destas catro paredes, afastados das comodidades de Monte Pío, hai miles de galegos esperando por unha vivenda ou unha praza nunha residencia, ou esperando que o seu fillo teña o profesorado de reforzo".

A maiores disto, Rodil defendeu as propostas do seu grupo neste debate sobre ámbitos como a vivenda, a sanidade, a dependencia e a situación económica de Galicia.

O PSdeG culpa ao PP dunha "demolición deliberada" do benestar

A viceportavoz parlamentaria do PSdeG, Lara Méndez, culpou o Partido Popular e o Goberno galego de levar a cabo unha "demolición deliberada" do Estado de Benestar na comunidade e levar a cabo unha política que cambia os dereitos por "bonos". "A 'Galicia calidade' que tanto predican convértese en 'Galicia caridade'", sentenciou.

Lara Méndez foi a encargada de defender na última das xornadas do debate sobre o estado da autonomía as 40 propostas de resolución impulsadas pola súa formación e que, segundo dixo, buscan "reconstruír os dereitos desmantelados polo Partido Popular".

Afeou aos populares unhas "cifras en vermello" con "máis demandantes de vivenda que nunca", listas de espera ou falta de prazas de residencias. "Durante 17 anos erosionaron as bases creadas e, agora, fronte a eses problemas estruturais en vivenda, en sanidade... responden con bonos", insistiu.

Lara Méndez atribuíu esta política da Xunta a unha "falta de planificación" e defendeu as propostas da súa formación para alcanzar retos como redución das listas de espera, a reforma do modelo asistencial da Atención Primaria, un novo plan de saúde mental realmente executado e a mellora das condicións laborais dos profesionais sanitarios.

Tamén reivindicou unha transición enerxética xusta e advertiu da intención do Goberno galego de pasar de pilotar a súa política industrial ao redor da "opacidade de Altri" a "un chiringuito que nace opaco" como Recursos de Galicia. 

Nunha intervención en que tamén defendeu a oferta da súa formación para crear unha comisión bilateral Estado-Xunta que participe nas decisións dos aeroportos, volveu a instar o Goberno galego a aceptar a condonación da débeda ao asegurar que "ninguén entende" esta negativa.

Ojea (DO) di que as súas propostas "beneficiarán calquera provincia"

O primeiro en intervir este venres foi o deputado de Democracia Ourensana Armando Ojea. Defendeu 40 propostas que, segundo dixo, "beneficiarán a calquera provincia", como as relativas ao ámbito sanitario.

En concreto, expuxo 40 propostas, e a mesa do Parlamento autonómico admitiu todas, segundo destacou na súa intervención este venres, na que lembrou que a súa "función fundamental" na Cámara galega é "defender os intereses da provincia de Ourense".

En todo caso, como "o regulamento esixe facer as propostas nunha clave máis xenérica e máis xeneral", augurou que as iniciativas que saian adiante "beneficiarían, loxicamente, a calquera provincia" e "a calquera cidade, a calquera zona, a calquera comarca".

En todo caso, Ojea presentounas "pensando nas cuestións que máis precisa" á súa entender a provincia de Ourense. Así, alén de abordar aspectos da atención sanitaria, as propostas de Democracia Ourensá tamén se dirixen a campos como o da vivenda, a seguridade e o Xacobeo, entre outros.

O PP defende medidas para unha Galicia "en perfecto estado de revista, disposta a mellorar"

O portavoz do PPdeGalicia no Parlamento, Alberto Pazos, defendeu as medidas presentadas polo seu grupo, xa que evidencian unha Galicia "en perfecto estado de revista" e que está "disposta a mellorar". 

Na súa intervención, Pazos lembrou que este 10 de abril conmemórase o medio século do falecemento de Ramón Otero Pedrayo e asegurou que o insigne galeguista "sentiríase orgulloso" da Galicia actual.

Segundo Pazos, o debate sobre o estado da autonomía demostrou "a estabilidade política" que hai na comunidade e desdeñou as críticas dos grupos da oposición a un Goberno galego ao que cualifican como "estancado".

"Levan anos aí, nos escanos da oposición, e din que os estancados somos nós", ironizou.

Alén dunha defensa das súas propostas, que recollen os compromisos explicitados polo presidente galego, Alfonso Rueda, na xornada do mércores, Pazos insistiu en que as medidas do BNG non fan outra cousa que profundar no seu "modelo do non", mentres que as do PSdeG demostran o "non modelo" dos socialistas.

A uns e a outros lles achacou falta de rigor para xestionar e de permanecer "calados" ante os agravios do Gobierno central.

Agradeceu, en cambio, ao deputado do grupo Mixto, Armando Ojea (Democracia Ourensá), a súa vontade de diálogo.

Negociacións previas

Como no anterior debate desta lexislatura, o PP optou por aprobar directamente varios textos de Democracia Ourensá, en concreto cinco iniciativas, mentres que tamén aprobará unha proposta do PSdeG relativa ao profesorado de Audición e Linguaxe.

Das cinco propostas que aprobará sen modificacións a Democracia Ourensana, destacan tres delas relacionadas con sanidade. Os populares darán luz verde a que se garanta que todos os barrios urbanos densamente poboados conten con centros de saúde dimensionados, á execución dun plan que garanta que o número de especialidades e que os investimentos estean adaptadas á demografía e a reforzar o acceso territorial á atención médica personalizada mediante o uso intensivo da telemedicina.

Ademais, aprobarán unha relativa ao reequilibrio da despregadura das forzas de seguridade para garantir a cobertura no rural e outra para garantir que a programación de eventos culturais no marco do Xacobeo non discrimine o interior de Galicia. Tamén transaccionará con Democracia Ourensana catro iniciativas relacionadas con axudas para o comercio de proximidade, un plan integral de mellora da seguridade viaria nas contornas de centros educativos, o acondicionamento de estradas autonómicas que atravesen núcleos urbanos e o desenvolvemento de proxectos de aldeas sostibles e centros de interpretación ambiental.

Con todo, un ano máis, o principal partido da oposición, o BNG, non conseguirá que o debate de autonomía aprobe algunha das súas iniciativas dado que o PP optou por non apoiar ningunha delas. Os populares tamén transaccionaron cos socialistas unha iniciativa sobre a lei de cultura inclusiva. Con todo, a pesar destes acordos, a tarde de negociacións deste xoves no Parlamento estivo marcada pola proposta de modificación na medida estrela que o presidente da Xunta Alfonso Rueda anunciou durante o debate respecto ao endurecemento do control das baixas laborais, que xerou discrepancias entre os grupos.

No marco das negociacións das propostas do debate do estado da autonomía, os populares intentaron negociar unha transacción neste campo tanto con Democracia Ourensana como co PSdeG, a fin de que nun prazo máximo de tres meses presente un plan integral co obxectivo de diminuír os niveis de absentismo laboral na comunidade autónoma, garantindo o máximo respecto aos dereitos laborais e desde a escoita activa do tecido empresarial e das organizacións sindicais a través do diálogo social.

Dado que ningún dos grupos aceptou esta transacción, finalmente votarase o texto inicial que unicamente propón poñer en marcha un procedemento común entre as Unidades de Inspección e Control de Saúde Laboral para a valoración de pacientes en situación de Incapacidade Temporal, sen que se afine a forma e o prazo para actuar neste campo.

Así, o balance das proposicións aprobadas é similar ao de anteriores debates a pesar de que os intentos de chegar a acordos se estenderon ata última hora e o rexistro das propostas se produciu a escasos momentos de que pechase o prazo, ás 22:30 horas. De feito, pasado ese linde, aínda o portavoz do Grupo Mixto Armando Ojea se atopaba nas dependencias do grupo popular.

Tamén destacaron as conversacións sobre un tema sensible, a memoria democrática, xa que todos os partidos presentaron propostas e intentaron acordar un texto conxunto. A pesar diso, finalmente só chegaron a un acordo PSdeG e o BNG, cun texto no que defenden a transferencia a Galicia do Pazo de Meirás, baixo a fórmula de cesión modal, que o PP rexeita.

Ademais, nacionalistas e socialistas mostraron posturas achegadas en diversos ámbitos e tamén transaccionaron propostas relativas a materias como a investigación sobre a produtividade nas rías galegas, o financiamiento universitario ou a I+D+i.