Un motorista queda ferido en Oleiros cando trataba de esquivar un animal
Foron os seus propios compañeiros os que, ao velo tirado na gabia, alertaron o 112
Veciños din que na zona, onde non hai iluminación, xa se produciron varios accidentes con animais
Na estrada que conduce ao porto de Lorbé quedaron as pegadas do sinistro. O home, veciño de Mera, duns 25 anos, circulaba na súa moto cara ao seu traballo cando sufriu o accidente. "Cruzóuselle un animal, perdeu o control e caeu da moto".
Foron os seus propios compañeiros os que, ao velo tirado na gabia, alertaron o 112. "Viñamos tamén a traballar e xa o vimos tirado na gabia. Fomos axudarlle e chamamos os servizos de emerxencias. Tiña a moto enriba dunha perna".
Aconteceu contra as sete menos dez desta mañá, nesta zona onde os veciños contan que non hai iluminación e onde xa houbo varios accidentes con animais. "Por mor dos xabarís, aí xa houbo accidentes". "Amais non hai farois, está todo ás escuras".
Desta volta, o motorista foi trasladado nunha ambulancia do 061 ao CHUAC. Sufriu lesións nunha perna.
