Ferido grave o condutor dun camión tras colidir contra un turismo en Maceda

Dúas persoas resultaron feridas, unha delas de gravidade, tras unha colisión frontolateral entre un camión lixeiro e un turismo en Foncuberta, no municipio ourensán de Maceda.

O suceso tivo lugar sobre as 15:50 horas deste sábado na estrada OU-103, que conecta Maceda cos Milagres, segundo informou a Garda Civil.

O condutor do turismo, un Opel Astra, resultou ferido leve e foi trasladado en ambulancia. O home que ía conducindo o camión tivo que ser evacuado no helicóptero H-4 ao estar ferido grave.

Debido á violencia coa que sucedeu o impacto, ambos vehículos presentaban graves danos. Pola súa posición final, ocupando case todo o ancho da calzada, foi preciso regular a circulación.

Ata o lugar dos feitos mobilizáronse un helicóptero e unha ambulancia do 061, así como tamén Protección Civil de Maceda, unha patrulla de motoristas e un equipo de sinistros do Subsector de Tráfico da Garda Civil de Ourense.