Falecen polo menos 37 persoas tras a caída dun autobús por un abismo no sur do Perú
Ao ano morren no país en accidentes de tráfico arredor de 3.000 persoas, a maioría por atropelos, e uns 55.000 quedan feridos, segundo cifras do Consello Nacional de Seguridade Viaria
Fotografía compartida por @DNewsOK en X, segundo o xornal ecuatoriano 'La República EC'
A caída dun autobús de transporte de pasaxeiros por un abismo nunha zona rural da rexión de Arequipa, no sur do Perú, provoca polo menos 37 falecidos segundo informaron este mércores autoridades rexionais e fontes sanitarias.
O autobús sufriu o accidente durante a madrugada deste mércores á altura do quilómetro 780 da estrada Panamericana Sur, no distrito de Ocoña, tras aparentemente chocar contra unha camioneta, informou a emisora RPP.
O xerente rexional de Saúde de Arequipa, Walther Oporto, declarou á emisora que as autoridades informaron inicialmente de que as vítimas mortais eran 17, pero co paso das horas esa cifra elevouse a 37.
"Lamentablemente, ata o momento, confirmáronse 36 falecidos no lugar (do accidente) e un falecido no centro de saúde Ocoña. É probable que xa sexa a cifra definitiva, porque o persoal de bombeiros chegou ata o lugar", sostivo Oporto.
O xerente sanitario reiterou que as autoridades rexionais cren que "esa é lamentablemente a cifra definitiva" de mortos e engadiu que hai 18 feridos, 14 dos cales segundo el están a ser atendidos no hospital de Camaná e catro xa están a ser derivados cara a Arequipa". Con todo, as redes sociais da Xerencia publicaron unha lista 24 persoas feridas, que permanecen no hospital da cidade de Camaná.
Segundo a información difundida ata o momento, o vehículo pertencía á empresa Llamosas e partira desde o distrito de Chala, na provincia de Caravelí, cara á cidade de Arequipa, a capital rexional.
Os accidentes deste tipo son habituais en estradas de Perú, causados na súa maioría pola imprudencia dos condutores, o mal estado das vías e do parque automotor, así como polas condicións agrestes da xeografía.
