Falece un traballador nun accidente laboral en Padrón
Unha máquina atrapou a vítima, de 22 anos, sen que os servizos de emerxencias puidesen salvarlle a vida
O falecido veciño de Valga e levaba ano e medio empregado na perfilería de aluminio de Cortizo
Un traballador faleceu este mércores de madrugada nun accidente laboral nunha nave da empresa Cortizo situada no concello de Padrón.
O accidente tivo lugar cando o operario estaba a traballar na zona de prensadura desta industria do aluminio. Unha máquina atrapou e esmagou a vítima, un mozo de 22 anos, e os servizos de emerxencias non puideron salvarlle a vida. O accidente produciuse de madrugada.
Ata o lugar do suceso, o 061 desprazou unha ambulancia asistencial de soporte vital avanzado, outra de soporte vital básico e persoal da PAC de Padrón para atender o home
🔴 #AXEGAInforma dun traballador falecido en #Padrón. Unha máquina atrapou a vítima sen que os servizos de emerxencias puidesen salvarlle a vida. Interviñeron: Urxencias Sanitarias de Galicia-061, #GESPadrón, #PolicíaLocal e @guardiacivil. pic.twitter.com/CQrpPxyv2f
— 112Galicia (@112Galicia) March 16, 2022
O lugar do sinistro está moi preto da base do grupo de urxencias supramunicipais de Padrón, polo que acudiron axiña.
"Si. Fomos o primeiro equipo de urxencias en chegar ao punto", sinala Julio Alberto Aldrey, xefe do equipo do GES de Padrón e explica que "ás 3.45 horas, de madrugada, recibimos a chamada do 112 alertándonos dun posible atrapamento dunha persoa nunha máquina. Chegamos alí e o operario estaba tendido no chan. Fixemos a comprobación das constantes vitais e fixemos as manobras de RCP e máis DESA ata que chegou o persoal sanitario ao punto".
Segundo informa a empresa, a vítima levaba ano e medio traballando. A noite pasada, cando desenvolvía a súa quenda de traballo que remataría ás seis, sufriu o accidente.
