Falece un octoxenario atropelado nun paso de peóns en Soutelo de Montes

Un veciño de Ventoxo, no concello de Forcarei, faleceu tras ser atropelado cando cruzaba por un  paso de peóns situado no centro de Soutelo de Montes, por onde pasa a estrada nacional 541 que une Ourense e Pontevedra.

A vítima, de 86 anos, estaba xa rematando de cruzar cando un vehículo conducido por un varón duns 60 anos levou o home por diante. 

Os datos sobre sinistralidade son preocupantes: o 10 % dos falecidos nas estradas galegas son peóns. Nesta ocasión, a mala visibilidade semella ser a causa do atropelo, xa que un fallo eléctrico da iluminación pública mantiña a zona sen luz. 

A vítima mantívose consciente en todo momento, malia que, segundo algunhas testemuñas, tiña problemas para respirar.

Ata o lugar desprazouse a Garda Civil, Protección Civil de Forcarei e unha ambulancia, que procedeu ao seu traslado a un centro hospitalario, a onde xa chegou sen vida.